ಇಂದಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ನಾವೆಲ್ಲರೂ ಓಟದಲ್ಲಿದ್ದೇವೆ. ಆದರೆ ಕೆಲವೊಮ್ಮೆ ಸಣ್ಣ ಸಣ್ಣ ಘಟನೆಗಳು ನಮಗೆ ಜೀವನದ ದೊಡ್ಡ ಪಾಠಗಳನ್ನು ಕಲಿಸುತ್ತವೆ. ಇತ್ತೀಚೆಗೆ ಇನ್ಸ್ಟಾಗ್ರಾಮ್ನಲ್ಲಿ ವೈರಲ್ ಆಗಿರುವ ಒಂದು ವಿಡಿಯೋ ಅಂತಹದ್ದೇ ಒಂದು ಮಾನವೀಯ ಪಾಠವನ್ನು ಜಗತ್ತಿಗೆ ಸಾರುತ್ತಿದೆ. ಊಟದ ಡಬ್ಬಿಯಲ್ಲಿ ಕೇವಲ ರೊಟ್ಟಿ ಮತ್ತು ಸಕ್ಕರೆ ತಂದಿದ್ದ ಮಗುವಿನ ಬಗ್ಗೆ ಶಿಕ್ಷಕಿಯೊಬ್ಬರು ತೋರಿದ ಕಾಳಜಿ ಈಗ ಲಕ್ಷಾಂತರ ಜನರ ಕಣ್ಣಾಲಿಗಳನ್ನು ಒದ್ದೆ ಮಾಡಿದೆ.
ವೈರಲ್ ಆಗಿರುವ ಆ ರೀಲ್ನಲ್ಲಿ, ಮಧ್ಯಾಹ್ನದ ಊಟದ ಸಮಯದಲ್ಲಿ ಶಿಕ್ಷಕಿಯೊಬ್ಬರು ಮಕ್ಕಳ ಊಟದ ಡಬ್ಬಿಗಳನ್ನು ಗಮನಿಸುತ್ತಾ ಸಾಗುತ್ತಾರೆ. ಆಗ ಒಬ್ಬ ಪುಟ್ಟ ವಿದ್ಯಾರ್ಥಿಯ ಡಬ್ಬಿಯಲ್ಲಿ ಕೇವಲ ರೊಟ್ಟಿ ಮತ್ತು ಸ್ವಲ್ಪ ಸಕ್ಕರೆ ಮಾತ್ರ ಇರುವುದನ್ನು ಅವರು ಗಮನಿಸುತ್ತಾರೆ. ಸಾಮಾನ್ಯವಾಗಿ ಇಂತಹ ಸಂದರ್ಭಗಳಲ್ಲಿ ಮಗು ಮುಜುಗರಕ್ಕೊಳಗಾಗುವ ಸಾಧ್ಯತೆ ಇರುತ್ತದೆ. ಆದರೆ ಆ ಶಿಕ್ಷಕಿ ಆ ಪರಿಸ್ಥಿತಿಯನ್ನು ನಿಭಾಯಿಸಿದ ರೀತಿ ನಿಜಕ್ಕೂ ಅದ್ಭುತ.
ಶಿಕ್ಷಕಿಯ ಹೃದಯಸ್ಪರ್ಶಿ ನಡೆ:
ಶಿಕ್ಷಕಿ ಮಗುವನ್ನು ಪ್ರಶ್ನಿಸಿ ಮುಜುಗರಕ್ಕೀಡು ಮಾಡುವ ಬದಲು, ಆತನ ಬೆನ್ನು ತಟ್ಟಿ ಪ್ರೋತ್ಸಾಹಿಸುತ್ತಾರೆ. “ಇದು ತುಂಬಾ ರುಚಿಯಾದ ಊಟ, ಚೆನ್ನಾಗಿ ತಿನ್ನು” ಎಂಬ ಧಾಟಿಯಲ್ಲಿ ಆತನನ್ನು ಪ್ರೀತಿಯಿಂದ ಮಾತನಾಡಿಸುತ್ತಾರೆ. ಮಗುವಿನ ಆತ್ಮಗೌರವಕ್ಕೆ ಧಕ್ಕೆಯಾಗದಂತೆ, ಆತನಲ್ಲಿ ಕೀಳರಿಮೆ ಮೂಡದಂತೆ ಅವರು ನಡೆದುಕೊಂಡ ರೀತಿ ನಿಜವಾದ ಶಿಕ್ಷಕ ವೃತ್ತಿಗೆ ಗೌರವ ತರುವಂತಿದೆ.
ಈ ವಿಡಿಯೋ ಹಂಚಿಕೊಂಡ ಕೆಲವೇ ಗಂಟೆಗಳಲ್ಲಿ ಮಿಲಿಯನ್ ಗಟ್ಟಲೆ ವೀಕ್ಷಣೆ ಪಡೆದಿದೆ. ಸಾವಿರಾರು ಜನರು ಶಿಕ್ಷಕಿಯ ತಾಳ್ಮೆ ಮತ್ತು ಕರುಣೆಯನ್ನು ಶ್ಲಾಘಿಸಿದ್ದಾರೆ. ಒಬ್ಬ ಬಳಕೆದಾರರು ಪ್ರತಿಕ್ರಿಯಿಸುತ್ತಾ, “ನಾನು ಕೂಡ ಚಿಕ್ಕವನಿದ್ದಾಗ ರೊಟ್ಟಿ-ಸಕ್ಕರೆ ತಿಂದೇ ಬೆಳೆದವನು, ಇಂದು ನಾನು ಉತ್ತಮ ಕೆಲಸದಲ್ಲಿದ್ದೇನೆ. ಈ ವಿಡಿಯೋ ನೋಡಿ ಹಳೆಯ ನೆನಪುಗಳು ಮರುಕಳಿಸಿದವು” ಎಂದು ಭಾವುಕರಾಗಿ ಬರೆದುಕೊಂಡಿದ್ದಾರೆ.