ಕೆಟ್ ಜಗತ್ತಿನಲ್ಲಿ ಪ್ರತಿಭೆಯ ಜೊತೆಗೆ ಮನುಷ್ಯತ್ವವೂ ಅಷ್ಟೇ ಮುಖ್ಯ ಎಂಬುದನ್ನು ಟೀಮ್ ಇಂಡಿಯಾ ಆಟಗಾರ ಮತ್ತು ರಾಜಸ್ಥಾನ್ ರಾಯಲ್ಸ್ ತಂಡದ ನಾಯಕ ಸಂಜು ಸ್ಯಾಮ್ಸನ್ ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಕೇರಳದ ಪಾಲಕ್ಕಾಡಿನಲ್ಲಿ ನಡೆದ ಈ ಘಟನೆ ಈಗ ಎಲ್ಲೆಡೆ ವೈರಲ್ ಆಗುತ್ತಿದ್ದು, ಅಭಿಮಾನಿಗಳ ಮನ ಗೆದ್ದಿದೆ.
ಅನಿರೀಕ್ಷಿತ ಭೇಟಿ, ಅವಿಸ್ಮರಣೀಯ ಕ್ಷಣ
ಪಾಲಕ್ಕಾಡಿನ ಸ್ಥಳೀಯ ಮೈದಾನವೊಂದಕ್ಕೆ ಟಿ. ಸಬರೀಶ್ ಎಂಬ ಯುವಕ ಎಂದಿನಂತೆ ಕ್ರಿಕೆಟ್ ಆಡಲು ಬಂದಿದ್ದರು. ಆದರೆ ಅಲ್ಲಿ ಅವರಿಗೆ ಕಾದಿದ್ದು ಒಂದು ದೊಡ್ಡ ಸರ್ಪ್ರೈಸ್! ಮೈದಾನದ ಪಕ್ಕದಲ್ಲಿ ನಿಂತಿದ್ದ ಕಾರಿನ ಬಳಿ ಖುದ್ದು ಸಂಜು ಸ್ಯಾಮ್ಸನ್ ನಿಂತಿರುವುದನ್ನು ನೋಡಿ ಸಬರೀಶ್ ಆಶ್ಚರ್ಯಚಕಿತರಾದರು. ಕೇವಲ ಟಿವಿಯಲ್ಲಿ ನೋಡುತ್ತಿದ್ದ ನೆಚ್ಚಿನ ಆಟಗಾರ ಕಣ್ಣೆದುರೇ ಕಂಡಾಗ ಸಬರೀಶ್ ಅವರ ಸಂತೋಷಕ್ಕೆ ಪಾರವೇ ಇರಲಿಲ್ಲ.
ಒಡೆದ ಫೋನ್ ನೋಡಿ ಸಂಜು ಮಾಡಿದ ಕೆಲಸವೇನು?
ತಕ್ಷಣ ಸಂಜು ಅವರ ಬಳಿ ಓಡಿ ಹೋದ ಸಬರೀಶ್, ಒಂದು ಸೆಲ್ಫಿ ತೆಗೆದುಕೊಳ್ಳಲು ವಿನಂತಿಸಿದರು. ಅಭಿಮಾನಿಯ ಪ್ರೀತಿಯ ಕರೆಗೆ ಓಗೊಟ್ಟ ಸಂಜು ಸ್ಯಾಮ್ಸನ್ ಸೆಲ್ಫಿಗೆ ಮುಗುಳ್ನಗುತ್ತಲೇ ಪೋಸ್ ನೀಡಿದರು. ಈ ವೇಳೆ ಸಬರೀಶ್ ಅವರ ಮೊಬೈಲ್ ಡಿಸ್ಪ್ಲೇ ಸಂಪೂರ್ಣವಾಗಿ ಒಡೆದಿರುವುದನ್ನು ಸಂಜು ಗಮನಿಸಿದರು.
ಯಾವುದೇ ಮುನ್ಸೂಚನೆ ನೀಡದ ಸಂಜು, ತಕ್ಷಣ ತಮ್ಮ ಕಾರಿನ ಡಿಕ್ಕಿ ತೆರೆದು ಅದರಲ್ಲಿದ್ದ ಹೊಸ ಮೊಬೈಲ್ ಬಾಕ್ಸ್ ಒಂದನ್ನು ಹೊರತೆಗೆದರು. ಅದನ್ನು ಸಬರೀಶ್ ಕೈಗಿಟ್ಟು:
“ನಿನ್ನ ಫೋನ್ ಹಾನಿಯಾಗಿದೆ, ಈ ಹೊಸ ಫೋನ್ ಅನ್ನು ನೀನೇ ಇಟ್ಟುಕೋ. ಚೆನ್ನಾಗಿ ಕ್ರಿಕೆಟ್ ಆಡು, ನಿನಗೆ ಒಳ್ಳೆಯದಾಗಲಿ” ಎಂದು ಬೆನ್ನುತಟ್ಟಿ ಹರಸಿದ್ದಾರೆ.
ಸರಳತೆಗೆ ಸಾಕ್ಷಿಯಾದ ಸಂಜು
ಸ್ಟಾರ್ ಆಟಗಾರನಾಗಿದ್ದರೂ ಯಾವುದೇ ಹಮ್ಮು-ಬಿಮ್ಮು ಇಲ್ಲದೆ ಸಾಮಾನ್ಯ ಯುವಕನಿಗೆ ನೆರವು ನೀಡಿದ ಸಂಜು ಅವರ ಈ ನಡೆಯನ್ನು ಕಂಡ ಜನರು ಬೆರಗಾಗಿದ್ದಾರೆ. ಕೇವಲ ಆಟದಿಂದ ಮಾತ್ರವಲ್ಲದೆ, ಇಂತಹ ಉದಾತ್ತ ಗುಣಗಳಿಂದಲೂ ಸಂಜು ಸ್ಯಾಮ್ಸನ್ ಎಲ್ಲರ ಮೆಚ್ಚಿನ ಕ್ರಿಕೆಟಿಗನಾಗಿ ಹೊರಹೊಮ್ಮುತ್ತಿದ್ದಾರೆ.
